ઉત્તર-પશ્ચિમ ચીનનો કિંગહાઈ પ્રાંત મંગળવારે ભૂકંપના જોરદાર આંચકાથી ધ્રૂજી ઊઠ્યો છે. ‘ચીન ભૂકંપ નેટવર્ક કેન્દ્ર’ ના જણાવ્યા અનુસાર, કિંગહાઈ પ્રાંતના હેક્સી વિસ્તારમાં રિક્ટર સ્કેલ પર 6.3ની તીવ્રતાનો અત્યંત શક્તિશાળી ભૂકંપ નોંધાયો છે. ભૂકંપના આ તેજ આંચકા બાદ સમગ્ર વિસ્તારમાં એલર્ટ જાહેર કરી દેવામાં આવ્યું છે. પ્રાથમિક અંદાજ મુજબ આશરે 8,600થી વધુ લોકો આ આપત્તિથી પ્રભાવિત થાય તેવી આશંકા છે.
રોયટર્સના અહેવાલ મુજબ, જમીનની અંદર આ ભૂકંપનું કેન્દ્રબિંદુ માત્ર 10 કિલોમીટરની ઊંડાઈએ હતું. ભૂકંપનું કેન્દ્ર ઓછી ઊંડાઈએ હોવાના કારણે આંચકા ખૂબ જ તીવ્ર અને ભયાનક અનુભવાયા હતા.
ભૂકંપના આ આંચકાઓને કારણે જૂની અને નબળા બાંધકામવાળી ઈમારતોને મોટું નુકસાન પહોંચી શકે છે. સ્થાનિક અહેવાલો અનુસાર, પ્રભાવિત વિસ્તારના અલગ-અલગ ભાગોમાં લોકોએ ખૂબ જ જોરદાર આંચકા અનુભવ્યા હતા, જેના કારણે લોકો ડરના માર્યા પોતાના ઘરોની બહાર દોડી આવ્યા હતા. જોકે, રાહતની વાત એ છે કે આપત્તિના તરત જ બાદ હજુ સુધી કોઈ મોટી જાનહાનિ કે કોઈ વ્યક્તિ ઘાયલ થયાના સમાચાર સામે આવ્યા નથી.
સ્થાનિક વહીવટીતંત્ર અને ચીનની ડિઝાસ્ટર મેનેજમેન્ટ ટીમો પ્રભાવિત વિસ્તારોમાં પહોંચી ગઈ છે અને નુકસાનનું સચોટ આકલન કરી રહી છે. આ સાથે જ રાહત અને બચાવ કામગીરીને આગળ વધારતા અધિકારીઓ સતત પરિસ્થિતિ પર નજર રાખી રહ્યા છે.
About The Author
