મોરબી-હળવદ હાઈવે પર શુક્રવારે મોડી રાત્રે એક ગમખ્વાર અકસ્માત સર્જાયો હતો. રાતના સમયે ફૂલ સ્પીડમાં આવતી કાર રોડ ક્રોસ કરી રહેલા ડમ્પર સાથે ધડાકાભેર અથડાઈ હતી. જેમાં કારમાં સવાર પાંચ લોકોના મોત નીપજ્યા છે. બે લોકો ગંભીર ઈજાગ્રસ્ત થયા સારવાર ચાલી રહી છે. સ્થાનિક પોલીસ અને લોકો ઘટના સ્થળે પહોંચીને ઈજાગ્રસ્તનો સારવાર માટે રાજકોટ અને મોરબી સિવિલ હોસ્પિટલ ખસેડ્યા હતા. જેસીબીની મદદથી કારમાંથી મૃતદેહો કાઢવાની ફરજ પડી હતી.
ઘટના અંગે મળતી માહિતી પ્રમાણે શુક્રવારે રાત્રે આશરે 9.30 વાગ્યાના સમયે મોરબી-હળવદ હાઈવે પર ચરાડવા ગામ નજીક એક ડમ્પર રોડ ક્રોસ કરી રહ્યું હતું. ત્યારે હાઈવ પર ફૂલ સ્પીડમાં આવતી કાર ડમ્પરમાં ધડાકાભેર ઘૂસી ગઈ હતી. જેના કારના ભૂક્કા બોલાઈ જતાં ગમખ્વાર અકસ્માત સર્જાયો હતો.
આ ગંભીર અકસ્માતમાં પાંચ લોકોના મોત થયા હતા, જ્યારે બે વ્યક્તિઓ ગંભીર રીતે ઇજાગ્રસ્ત થયા હતા. અકસ્માતની આ ઘટના CCTVમાં પણ કેદ થઈ છે. રણછોડગઢ ગામના રહેવાસીઓ કિયા કારમાં સવાર થઈને એક ઇજાગ્રસ્ત વ્યક્તિને સારવાર માટે હોસ્પિટલે લઈ જઈ રહ્યા હતા.
આ દરમિયાન ચરાડવા ગામ નજીક પેટ્રોલ પંપની સામેના ભાગમાં કારખાનામાંથી બહાર નીકળી રોડ ક્રોસ કરી રહેલા ડમ્પર સાથે તેમની કાર અથડાઈ હતી. ટક્કર એટલી ભયાનક હતી કે, પૂરઝડપે આવી રહેલી કાર ડમ્પરમાં ઘૂસી ગઈ હતી.
આ બનાવમાં કારમાં બેઠેલા વ્યક્તિઓ કારમાં ફસાઈ ગયા હતા. જેથી જેસીબીની મદદથી કારના પતરા ખેંચીને તે લોકોને બહાર કાઢવામાં આવ્યા હતા. અકસ્માત સર્જાતા ઘટનાસ્થળે લોકોના ટોળેટોળા ઉમટ્યાં હતા. આ બનાવ સંદર્ભે હળવદ તાલુકા પોલીસ સ્ટેશન ખાતે ફરિયાદ લેવા માટેની તજવીજ હાથ ધરવામાં આવી હોવાનું સૂત્રો પાસેથી જાણવા મળી ગયું છે.
ઘટના અંગે મૃતકોના પરિવારજનોના જણાવ્યા અનુસાર તેઓ હળવદ તાલુકાના માનસર ગામ પાસે બાઈક સ્લીપ થવાથી ઇજાગ્રસ્ત થયેલા એક વ્યક્તિને હોસ્પિટલે લઈ જઈ રહ્યા હતા. અકસ્માતની જાણ હળવદ તાલુકા પોલીસ સ્ટેશનને કરવામાં આવતા પોલીસે બનાવની નોંધ કરી વધુ તપાસ હાથ ધરી છે.
About The Author
