અમદાવાદના વૈભવી ગણાતા બોપલ વિસ્તારમાં એક ચોંકાવનારી ઘટના સામે આવી છે. લોરેન્સ બિશ્નોઈ ગેંગ સાથે કનેક્શન અને ડ્રગ્સ નેટવર્કની આશંકા ધરાવતો કુખ્યાત મહાવીરસિંહ સિંધવ ગઈકાલે સોમવારે (8 જૂન) રાત્રે બોપલના ‘અક્ષર લકઝૂરીયા’ ફ્લેટમાં ચોથા માળેથી નીચે પટકાતા મોતને ભેટ્યો છે.
નશાની હાલતમાં પાડોશી સાથે ઝઘડો કર્યા બાદ, સ્થાનિકોએ પોલીસ બોલાવતા પકડાઈ જવાની બીકે ભાગવા જતાં મહાવીરસિંહનો પગ લપસી ગયો હતો અને તે નીચે પટકાયો હોવાનો પોલીસે દાવો કર્યો છે. આ મામલે બોપલ પોલીસે હાલ અકસ્માતે મોતનો ગુનો નોંધીને વધુ તપાસ હાથ ધરી છે.
પ્રાથમિક માહિતી અનુસાર, મહાવીરસિંહ સિંધવ દારૂના નશામાં હતો અને તેના રહેઠાણ નજીક પડોશીઓ સાથે ઉગ્ર બોલાચાલી તથા ઝઘડો કરી રહ્યો હતો. ઘટનાની જાણ સ્થાનિક લોકોએ પોલીસને કરતાં બોપલ પોલીસની ટીમ સ્થળ પર પહોંચવા માટે રવાના થઈ હતી. જોકે પોલીસ આવે તે પહેલાં જ મહાવીરસિંહે ત્યાંથી ભાગવાનો પ્રયાસ કર્યો હતો.
સૂત્રોના જણાવ્યા મુજબ ભાગવાના પ્રયાસ દરમિયાન મહાવીરસિંહ સિંધવ બિલ્ડિંગના ચોથા માળેથી અચાનક લપસી ગયો હતો. ઊંચાઈ પરથી નીચે પટકાતા તેને માથાના ભાગે ગંભીર ઈજાઓ પહોંચી હતી. જોકે સ્થાનિક લોકોએ તાત્કાલિક મદદ કરવાનો પ્રયાસ કર્યો હતો પરંતુ ગંભીર ઈજાઓના કારણે તેનું ઘટનાસ્થળે જ મોત નીપજ્યું હતું.
ઘટનાની જાણ થતાં બોપલ પોલીસ સ્થળ પર પહોંચી હતી અને મૃતદેહને પોસ્ટમોર્ટમ માટે મોકલી આપ્યો હતો. પોલીસે અકસ્માત મૃત્યુનો ગુનો નોંધીને સમગ્ર મામલે વધુ તપાસ શરૂ કરી છે. પ્રાથમિક તપાસમાં સામે આવ્યું છે કે મૃતક મહાવીરસિંહ સિંધવ સામે સુરેન્દ્રનગર જિલ્લામાં પ્રોહિબિશન સહિતના પાંચ જેટલા ગંભીર ગુનાઓ નોંધાયેલા હતા. પોલીસ લાંબા સમયથી તેની શોધખોળ કરી રહી હતી.
About The Author
